කුරුඳු පසු අස්වනු තාක්ෂණය
පසු අස්වනු තාක්ෂණය යනු කායික විද්‍යාත්මක භෝග පරිණතියේ සිට අවසාන නිෂ්පාදනයේ සැකසීම, බෙදා හැරීම, අලෙවිකරණය සහ පරිභෝජනය දක්වා විවිධ අංශ ක්‍රියා කරන ආකාරයයි. මෙහිදී කුරුඳු වල ආවේනික වූ රසය, සුවඳට හානි නොවන අයුරින් සෞඛ්‍යාරක්ෂිත ලෙස අස්වනු සැකසීම කලයුතු වේ.
අස්වනු නෙලීම
කුරුඳු වගාවක පළමු වරට අස්වනු නෙලීම, සි‍ටුවා වසර දෙක සිට තුන දක්වා කාලය තුළ සිදු කළ හැක. ඒ වන විට අස්වැන්න නෙලීමට සුදුසු කඳන්වල අග කොටස් හැරුණු විට පිටත සුඹුල සම්පූර්ණයෙන්ම දුඹුරු පැහැ වී තිබීම දැකිය හැක.
කුරුඳු තැලෙන කාලය ලංකාවේ කෘෂි පාරිසරක කලාප අනුව වෙනස් වේ. වැසි කාලය ආරම්භයත් සමඟ කුරුඳු ගස්වල අලුතින් දළු හටගැනීම සිදුවේ. මේ දළු ක්‍රමයෙන් කොළ පාටට හැරෙන අවස්ථාවේදී පොතු ගැලවීම පහසු වන නිසා අස්වනු නෙලීමට සුදුසුම අවධිය මේ අවස්ථාවයි.
කුරුඳු ගසේ අලුත් දළු හෝ මල් හෝ ගෙඩි ඇති කාලවල දී පොතු ගැලවීම අපහසුවන බැවින් එම අවස්ථා මග හැර අස්වනු නෙලාගැනීම කල යුතුවේ.
හොඳ පාලන තත්ත්ව යටතේ වසරකට දෙවරක් හෝ තෙවරක් අස්වනු නෙලා ගත හැක. අස්වනු නෙලීම් දෙකක් අතර කාලාන්තරය වැඩි වීමෙන් කුරුඳු කඳන් මේරීම නිසා දැව ප්‍රතිශතය වැඩි වුවත් පොත්තේ බරෙහි සැලකිය යුතු වැඩිවීමක් සිදු නොවන අතර, සිහින් කුරුඳු තැලීමේ හැකියාවද අඩු වනු ඇත. එබැවින් වසර පුරාම අඛණ්ඩව කුරුඳු තැලීමට හැකි ලෙස වගාව නඩත්තු කළ යුතුය.
අස්වනු නෙලන ආකාරය
පොළොවේ සිට අඟල් එකහමාරක්, දෙකක් ඉහලින් පඳුර තුළට ආනතිය අංශක 45 වන ලෙස තියුණුවට මැද ගත් පිරිසිදු කැත්තකින් කැපීම සිදු කළ යුතුය. එවිට අළුත් රිකිළි වැඩි ප්‍රමාණයක් පඳුරෙන් පිටතට වර්ධනය වන අතර, එමඟින් පඳුර සජීවීව පවත්වාගෙන යාමට උපකාරී වේ. අස්වනු නෙලන අවස්ථාවේදී කපාගන්නා ලද කුරුඳු ගසේ කොළ පැහැති නොමේරූ කොටස්, හරස් අතු හා පත්‍ර ක්ෂේත්‍රයේ දීම ඉවත් කළ යුතුය.
ගැට පෑහිම සහ කුරුට්ට සීරීම
සුදුසු බංකුවක් මත සිට නිවැරදි ආකාරයට දුඹුරු පැහැ පිට පොත්ත ( සුඹුල/කුරුට්ට) සූරන කොකැත්ත (සවුත්තුව) භාවිතයෙන් සීරීම කළ යුතුවේ.
කුරුඳු පොතු ගලවා ගන්නා ආකාරය
සුඹුල ඉවත් කල කුරුඳු කඳන් පොත්ත බුරුල් කිරීම සඳහා පොත්තෙන් යුෂ මතුවන තුරු පිත්තල දණ්ඩෙන් මැදීම කළයුතුයි. අභිමත ශ්‍රේණිය අනුව ගලවා ගන්නා පිට කොපු වල පළල නිර්ණය කර, තලන කොකැත්ත භාවිතයෙන් පිට කොපු ගලවා ගැනීම කළ යුතුයි. පිට කොපු (පිට ලෙලි) ලෙස පොතු ගැලවා ගැනීමට නොහැකි අවස්ථාවල සිහින් තීරු (‘පොඩි’) ලෙස පොතු ගලවා ගැනීම කළ හැකිවේ.
පොතු වියළා ගත යුතු ආකාරය
පිට ලෙලි අවශ්‍ය ප්‍රමාණයට පවනේ වියලීම සහ කැබැලි හෙවත් ‘පොඩි’ පිරිසිදුව අධික ලෙස නොවියලෙන සේ තැන්පත් කිරීම කල යුතුවේ.
සන්ධි කරන ආකාරය
ගැලවූ පොතු පවනේ අවශ්‍ය පමණ වියලා ගත්පසු (අවශ්‍ය පමණ රෝල් වුණු පසුව) එකක් මත එකක් වනසේ සන්ධි කර කැබැලි (පොඩි) ඇතුළට පුරවා අඟල් 42 / 21 ක් දිග කූරු සාදාගත හැක. සාදන කුරුඳු කූරු වල දිග මැනීමට සහ කූරු එසවීමට ‘පෙති කෝටුව’ භාවිතා වේ. කූරු සදා අවසන් වූ වහාම වියලීම ආරම්භ කලයුතුය. මේ සඳහා නූල් ඇද සකස් කරගත් රාක්ක මත පවනේ වියලීම කල යුතුයි. ඉන් අනතුරුව නැවතත් තෙතමනය 14 % ක් වන තුරු දින කීපයක් (දින 4 ක් -7ක් පමණ) පවනේ දැල් මත වියලීම කලයුතු වේ.
කුරුඳු සැකසීමට ගන්නා උපකරණ
සම්ප්‍රදායික කුරුඳු සැකසීමේ ක්‍රියාවලියේදී යොදා ගනු ලබන ආයුධ හා උපකරණ වන්නේ,
- කපන කැත්ත – කුරුඳු ගස් කපා ගැනීම සඳහා
- සූරන කොකැත්ත– කුරුට්ට සීරීම සඳහා
- පිත්තල දණ්ඩ – ලීයෙන් පොත්ත වෙන්කර ගැනීම සඳහා කරන මැදීමේ ක්‍රියාව සඳහා
- තලන කොකැත්ත – ලීයෙන් පොත්ත වෙන්කර ගැනීමේදී සිරස් හා තිරස් කැපුම් කිරීම සහ පොත්ත එසවීම සඳහා
- කතුර – කුරුඳු පොතු සන්ධිකර නියමිත දිගට පැමිණි පසු කපා සකස්කර ගැනීම සඳහා.
- පෙති කෝටුව – අඟල් 42 / 21 දිග මැන ගැනීම සඳහා
කුරුඳු ශ්‍රේණිය
- අවශ්‍ය ප්‍රමාණයට වියලුන පසුව කුරුඳු කූරු ශ්‍රේණි කිරීම කළ යුතුයි. ශ්‍රේණි කිරීමේදී වැදගත් නිර්ණායක තුනකි. එනම්,
- කුරුඳු කූරේ විෂ්කම්භය
- කිලෝග්රෑම් එකක් සෑදීමට අවශ්‍ය එම විෂ්කම්භය ඇති කූරු ගණන
- කූරු වල මතුපිට ඇති ලප කැළැල් ප්‍රතිශතය
- ඉහත නිර්ණායක අනුව කුරුඳු ශ්‍රේණි 13 ක් පමණ හදුනාගත හැකි වුවත්, සාමාන්‍ය ව්‍යවහාරයේදී ‘හීන් කුරුඳු’ හා ‘ගොරෝසු කුරුඳු’ ලෙස කාණ්ඩ දෙකක් හදුනාගත හැකිවේ. ඇල්බා සහ ‘C’ කාණ්ඩයේ කුරුඳු හීන් කුරුඳු ලෙසත්, ‘M’ සහ ‘H’ කාණ්ඩයේ කුරුඳු ගොරෝසු කුරුඳු ලෙසත් හැදින්වේ. තැලුම් කරුවන් ලෙස දැනුවත් විය යුත්තේ වැඩි ප්‍රතිශතයකින් හීන් කුරුඳු නිෂ්පාදනය කිරීමට වන අතර එමගින් ඔබගේ ආදායම ඉහල නංවා ගත හැකිවේ.
කුරුඳු සඳහා ප්‍රමිතීන්
සෞඛ්‍ය ආරක්‍ෂිත, ගුණාත්මයෙන් ඉහල අමුද්‍රව්‍ය හා ආහාර නිෂ්පාදන වලට ඇති ඉල්ලුම දිනෙන් දින ඉහල යමින් පවතී. මේ නිසා කුරුඳු වගාවේදී යහපත් කෘෂිකාර්මික පිළිවෙත් (Good Agricultural Practices-GAP) අනුගමනය කිරීම සහ කුරුඳු සැකසීමේදී යහපත් නිෂ්පාදන පිළිවෙත් (Good Manufacturing Practices-GMP) නිර්නායකයන් වලට නැඹුරුවීම මගින් නිෂ්පාදනයේ සෞඛ්‍ය ආරක්‍ෂිත ගුණාත්මකබව ඉහල නැංවිය හැකි වේ. මීට අමතරව කුරුඳු සඳහා ජාත්‍යන්තර තත්ත්ව සහතිකයක් වන කුරුඳු භූගෝලීය තත්ත්ව දර්ශකයද (Ceylon Cinnamon Geographical Indication – CCGI) 2022 දී ශ්‍රීලංකාවට ලබාගැනීමට හැකිවූ අතර, එමගින් ලංකා කුරුඳු සඳහා ගෝලීය වෙළඳ පොළ තුල ඉහල මිලක් ලබා ගැනීමටත් අවස්ථාව සැලසේ. මෙය ශ්‍රී ලංකාව ලබා ගත් පළමු භූගෝලීය දර්ශකය වන අතර එමගින් කුරුඳු වල ශ්‍රී ලාංකීය භූගෝලීය අනන්‍යතාව තහවුරු කරන අතර ලාංකීය කුරුඳු වෙළඳපොල සඳහා ඉදිරියට පැමිණෙන අභියෝග ජයගැනීමට හේතුවනු ඇත.
ශ්‍රී ලංකා ප්‍රමිතිකරණ ආයතනය මගින් ශ්‍රී ලංකා කුරුඳු සඳහා ප්‍රමිතියක් SLS 81:2021 ලෙස හඳුන්වා දී ඇත. මේ හා සමානව අන්තර්ජාතික ප්‍රමිතිකරණ ආයතනය (ISO) මගින් අවශ්‍යතා නිර්ණය කර ශ්‍රී ලංකා කුරුඳු සඳහා නව ප්‍රමිතිය ISO 6539 : 2014 යටතේ හඳුන්වා දී ඇත. මීට අමතරව යුරෝපා කුළුබඩු සංගමය, එක්සත් ජනපද ආහාර හා ඖෂධ අධිකාරිය ආදී ආයතන මගින්ද ඒ රටවලදී අදාළ වන ප්‍රමිතීන් හඳුන්වා දී ඇත.
කුරුඳු අස්වැන්න ප්‍රමාණය
වගාවේ වයස, පස, දේශගුණය, ප්‍රවේණි දර්ශ සහ භාවිතා කරන වගා පාලන ක්‍රම අනුව ලැබෙන කුරුඳු අස්වැන්න පුළුල් ලෙස වෙනස් විය හැක. ලංකාවේ දැනට පවතින සාමාන්‍ය කුරුඳු කූරු අස්වැන්න වර්ෂයකදී අක්කරයට කිලෝ ග්‍රෑම් 300ක් පමණ වේ. නමුත් මනා පාලන තත්ත්ව යටතේ මෙම අස්වැන්න අක්කරයට කිලෝ ග්‍රෑම් 450ක් දක්වා වැඩි කර ගත හැක. මේ සඳහා නිසි වෙලාවට, නිවැරදිව වගා නඩත්තුව කිරීම අවශ්‍ය වේ. කුරුඳු පර්යේෂණ මධ්‍යස්ථානයෙන් හඳුන්වා දී තිබෙන ‘ශ්‍රී විජය’ හා ‘ශ්‍රී ගැමුණු’ නව ප්‍රභේද භාවිතා කිරීම සහ යහපත් කෘෂිකාර්මික ක්‍රම අනුගමනය කිරීම මගින් මෙය අක්කරයට කිලෝ ග්‍රෑම් 600ක් දක්වා වැඩි කළ හැකිය. පොතු අස්වැන්නට අමතරව එක වසරකට අක්කරයකින් කුරුඳු කොළ අස්වැන්න කිලෝ ග්‍රෑම් 4000ක් පමණ ලබා ගත හැකි අතර, මෙම කොළ අස්වැන්න යොදාගෙන කොළ තෙල් නිස්සාරණය කිරීමෙන් අමතර ආදායමක් ලබා ගැනීමට හැක.
කුරුඳු නිෂ්පාදන
- කුරුඳු කූරු (සම්පූර්ණ කූරු) – Quills
හොඳින් මෝරන ලද කුරුඳු වගාවකින් ලබාගත් කඳන්හි, පිටත සුඹුල සූරා ගලවා වෙන් කරගත් ඇතුළත පොත්ත එක මත එක තබා සන්ධි කරගත් කූරුවෙයි. මේවායේ ඇතුළත කුහරය එම කුරුඳු වර්ගයේම කුඩා කැබලිවලින් පුරවා පවනේ වේලාගෙන තිබිය යුතුය. කූරක දිග සෙ.මී. 105 (අඟල් 42) විය යුතුවේ. කුරුඳු කූරු වගුව 1.1 දැක්වෙනආකාරයට ශ්‍රේණිවලට වෙන්කරනු ලැබේ.
වගුව 1.1: කුරුඳු ශ්‍රේණිය
ශ්‍රේණිය | ගලවා ගත යුතු පොත්තේ පළල (මි.මි.) | විශ්කම්භය (මි.මි.) | කි.ග්‍රෑම් 01 ක ඇති අගල් 42 දිග කුරු ගණන | ලප කැළැල් ප්‍රතිශතය |
ඇල්බා | 22 | 6 | 45 | 10 |
කොන්ටිනෙන්ටල් | ||||
C5-අති විශේෂ | 28 | 8 | 33 | 10 |
C5-විශේෂ | 35 | 10 | 30 | 10 |
C5 | 42 | 12 | 27 | 15 |
C4 | 54 | 16 | 22 | 15 |
C3 | 61 | 18 | 20 | 20 |
මෙක්සිකන් | ||||
M5-විශේෂ | 54 | 16 | 22 | 60 |
M5 | 60 | 18 | 20 | 60 |
M4 | 70 | 21 | 15 | 60 |
හැම්බර්ග් | ||||
H1 | 76 | 23 | 10 | 25 |
H2- විශේෂ | 83 | 25 | 09 | 40 |
H2 | 105 | 32 | 07 | 55 |
H3 | 123 | 38 | 06 | 65 |
- කැපූ කුරුඳු කූරු -Cut Quills
නියමිත දිගකට කපා කෙටි කර සකසා ගත් කුරුඳු කූරු වේ. සම්පුර්ණ කුරුඳු කූරු ලෙසටම ශ්‍රේණි කරනු ලැබේ.
- කුරුඳු කූරු කැබලි (සම්පූර්ණ කූරුවල කැඩුන කොටස්) – Quillings
සම්පූර්ණ කුරුඳු කූරුවලින් කැඩුණු විවිධ විශාලත්වයෙන් යුතු දිග මි. මී. 200ට අඩු කොටස් හා පතුරු මේ යටතට ගැනේ. මෙහි 5 % ක් දක්වා බර අනුව ෆෙදරින් සහ පොතු කැබලි අඩංගු විය හැක. වෙනත් බාහිර ද්‍රව්‍ය 2% ට වඩා අඩංගු නොවිය යුතුය.
- ෆෙදරින්ස් – Featherings
කුරුඳු කූරු සකස් කිරීමේදී කුරුඳු පොත්තෙන් කැඩී යන කුඩා කොටස්ය. මෙහි 10 % ක් දක්වා බර අනුව පොතු කැබලි අඩංගු විය හැක. වෙනත් බාහිර ද්‍රව්‍ය 2% ට වඩා අඩංගු නොවිය යුතුය.
- පොතු කැබලි – Chips
මේරූ, තද, ගැලවිය නොහැකි පිටත සුඹුල සහිත කොළ මිශ්‍ර දුඹුරු පැහැති පොතු මේ නමින් හඳුන්වයි. මෙය කෝටුවලින් ගලවා ගත නොහැකි නිසා සූරා වෙන් කරගත යුතුය. මෙහි වෙනත් බාහිර ද්‍රව්‍ය 2 % ට වඩා අඩංගු නොවිය යුතුය.
- කුරුඳු කුඩු / Ground Cinnamon
හොදින් මෝරන ලද කුරුඳු කඳන් වලින් ලබාගන්නා ඇතුළු පොත්ත වියළා, අඹරා සකස්කරන ලද කුරුඳු කුඩුය. කුඩු අංශු ප්‍රමාණය, 100% මයික්‍රෝ මීටර් 500 ට වඩා අඩුවිය යුතුයි. 90% මයික්‍රෝ මීටර් 300 ට වඩා අඩුවිය යුතුයි.
- Crushed Cinnamon
හොදින් මෝරන ලද කුරුඳු කඳන් වලින් ලබාගන්නා ඇතුළු පොත්ත වියළා, අඹරා සකස්කරන ලද රළු කුරුඳු කුඩුය. කුඩු අංශු ප්‍රමාණය, 90% මයික්‍රෝ මීටර් 500 ට වඩා වැඩිවිය යුතුයි.
- Special cuts
හොදින් මෝරන ලද කුරුඳු කඳන් වලින් ලබාගන්නා ඇතුළු පොත්ත වියළා, මිලි මීටර 1 – මිලි මීටර 5 ත් අතර කුඩා කැබලි වලට කපා සකස්කරන ලද කුරුඳු කැබලිය.
අගය එකතුකළ නිෂ්පාදන
කුරුඳු වල පවතින ඖෂධීය වටිනාකම නිසාම ඖෂධීය නිෂ්පාදන රාශියක් නිෂ්පාදනයට කුරුඳු යොදා ගැනේ. දියවැඩියාව, අධික රුධිර පීඩනය යනාදී රෝග වලට කුරුඳු යොදා ගන්නේ එහි ඇති රුධිරගත සීනි අඩුකිරීමේ හැකියාවත්, රුධිරගත කොලෙස්ටරෝල් අඩුකිරීමට ඇති හැකියාවත් නිසාවෙනි. ප්‍රති ඔක්සිකාරක ගුණ පවතින බැවින් තවත් රෝග සඳහා ප්‍රතිකර්ම ලෙස කුරුඳු යොදාගනී.
කුරුඳු රස කාරකයක් ලෙස යොදාගන්නා නිසා රස කැවිලි, බීම වර්ග, බේකරි නිෂ්පාදන වලදී භාවිත වේ. මීට අමතරව සුවඳ විලවුන් වැනි සුවඳවත් කරන ද්‍රව්‍ය සෑදීමට යොදා ගනියි. තවද කුරුඳුවල පවතින දිලිර නාශක හා බැක්ටීරියා නාශක ගුණ නිසා මුඛ සෝදන දියර, දත් බෙහෙත් (දන්තාලේපන) වැනි නිෂ්පාදන සඳහා යොදා ගනියි.
කුරුඳු සගන්ධ තෙල් (Cinnamon Essential Oil)
කුරුඳු ශාකයෙන් විවිධ සගන්ධ තෙල් වර්ග නිස්සාරණය කර ගත හැක. ශ්‍රී ලංකාවේ කුරුඳු (Cinnamomum verum) නිෂ්පාදන සඳහා ඉහළ ජාත්‍යන්තර පිළි ගැනීමක් පවතින හෙයින් මෙය ඉතා ලාභ ලබාගත හැකියාව පවතී.
කුරුඳු ශාකයෙන් ලබා ගත හැකි තෙල් ආශ්‍රිත නිශ්පාදන :
- කුරුඳු කොළ තෙල් (Cinnamon leaf oil)
- කුරුඳු පොතු තෙල් (Cinnamon bark oil)
කුරුඳු ගෙඩි සහ කුරුඳු මුල් වලින් තෙල් නිස්සාරණය කළ හැකි වුවද වාණිජ වශයෙන් සිදු නොකෙරේ.
කුරුඳු කොළ තෙල් නිස්සාරණය
කුරුඳු කොළවල තෙල් ප්‍රතිශතය 4 %ක් දක්වා විය හැක.
කුරුඳු අස්වනු නෙලිමේදී ඉවත් කරන කොළ හා රිකිලි අමුද්‍රව්‍ය ලෙස යොදාගනී. මේරූ කොළ සහ කැබලිකල කොළ වඩාත් සුදුසුය.
- කුරුඳු කොළ අස්වැන්න: 10,000 (වර්ෂයකට හෙක්ටයාරයට කිලෝග්රෑම්)
- සාමාන්‍ය තෙල් අස්වැන්න (කාර්මික): 1-2 % (කොළ බරෙන්)
- වාර්ෂික තෙල් අස්වැන්න: 100 (හෙක්ටයාරයට කිලෝග්රෑම්)
කුරුඳු කොළ තෙල් නිස්සාරණය පහත ක්‍රම මගින් සිදුකරගත හැකිවේ.
- ජල ආසවනය
- හුමාල-ජල ආසවනය
- හුමාල ආසවනය
මිට අමතරව නවීන තාක්ෂණ ක්‍රම ලෙස, විශේෂ නිශ්චයාත්මක අංගාරිකාම්ල නිස්සාරණය (supercritical Co2 extraction), ක්ෂුද්‍ර තරංග මගින් ආසවනය (Microwave Extraction) සහ අතිධ්වනි තරංග මගින් ආසවනය (Ultrasonicwave extraction), හදුන්වාදී තිබුනත් තවමත් කාර්මික වශයෙන් යොදාගන්නා අවස්ථා නොමැත. මේ නිසා දැනට ප්‍රධාන වශයෙන් හුමාල ආසවනය මගින් තෙල් නිස්සාරණය කරනු ලබයි.
ප්‍රයෝජන
කුරුඳු කොළ තෙල් මඟින් නොයෙක් සුවඳ විලවුන්, කෘමි විකර්ෂක, විෂබීජ නාශක , සුවඳ කාරක සහ ඖෂධ සාදනු ලැබේ.
කුරුඳු තෙල් සඳහා ප්‍රමිති
- SLS 184-2012: ජාතික ප්‍රමිතිය
- ISO 3524:2003: ජාත්‍යන්තර ප්‍රමිතිය
කුරුඳු කොළ තෙල් වල තිබිය යුතු භෞතික හා රසායනික නිර්ණායක මෙම ප්‍රමිති වල අන්තරගත වේ.
කුරුඳු පොතු තෙල් නිස්සාරණය තෙල් නිස්සාරණය
- කුරුඳු පොත්තෙහි 0.5 – 4.0 % දක්වා තෙල් ප්‍රතිශතයක් අඩංගුවේ.
- අමුද්‍රව්‍ය ලෙස කුරුදු කූරු කැබලි, ෆෙදරින්ස් සහ කට්ටා තෙල් නිස්සාරණය සදහා යොදා ගනියි.
- යොදා ගන්නා අමුද්‍රව්‍ය අනුව තෙල් වල අන්තර්ගත සිනමැල්ඩිහයිඩ් ප්‍රතිශතය වෙනස් වන අතර ඒ අනුව පොතු තෙල් වර්ගීකරණය කරනු ලැබේ.
ලක්ෂණ | අවශ්‍යතාව | |||
Superior grade | Special grade | Average grade | Ordinary grade | |
සිනමැල්ඩිහයිඩ් ප්‍රමාණය, බරෙහි ප්‍රතිශතයක් ලෙස | 60 ට වැඩි | 55-60 | 45-54 | 30-44 |
ඉයුජිනෝල් ප්‍රමාණය, බරෙහි ප්‍රතිශතයක් ලෙස | 6 | 15 | 25 | 40 |
කුරුඳු තෙල් සඳහා ප්‍රමිති
- SLS 185-2012 කුරුඳු පොතු තෙල් සඳහා ජාතික ප්‍රමතිය ලෙස පවතින අතර කුරුඳු පොතු තෙල් වල තිබිය යුතු භෞතික හා රසායනික නිර්ණායක මෙහි අන්තර් ගත වේ.
ප්‍රයෝජන
කුරුඳු පොතු තෙල් ප්‍රධාන වශයෙන් රසකාරකයක් ලෙස රස කැවිලි සහ පාන වර්ග නිෂ්පාදනයේ දී යොදගනී. තවද, පොතු තෙල් මඟින් නොයෙක් සුවඳ විලවුන් සහ ඖෂධ සාදනු ලැබේ.
ඔලියොරෙසින නිෂ්පාදනය
- ඔලියොරෙසින යනු රෙසින සහ වාෂ්පශීලි තෙල් වලින් සමන්විත අර්ධ-ඝන සාරයක් වන අතර ඒවා ද්‍රාවක නිස්සාරණය මඟින් ලබා ගනී.
ඔලියොරෙසින නිස්සාරණ ක්‍රම
- ද්‍රාවක නිස්සාරණය (Solvent Extraction) – මෙම ක්‍රමයට කුරුඳු වලින් රෙසින සහ වාෂ්පශීලී තෙල් දෙකම නිස්සාරණය කිරීම සඳහා සුදුසු කාබනික ද්‍රාවක භාවිතා කිරීම සිදුවේ.
- විශේෂ නිශ්චයාත්මක අංගාරිකාම්ල නිස්සාරණය (Supercritical Carbon Dioxide Extraction) – කුරුඳු වලින් සගන්ධ තෙල් සහ අනෙකුත් අවාෂ්පශීලි සංයෝග නිස්සාරණය කිරීම සඳහා ද්‍රාවකයක් ලෙස CO2 භාවිතා කරයි, එහි කාර්යක්ෂමතාව සහ සියුම් රසයන් සහ සුවඳ ආරක්ෂා කිරීමේ හැකියාව ඉහල මට්ටමක පවතී.
- ක්ෂුද්‍ර තරංග මගින් නිස්සාරණය (Microwave extraction) – කුරුඳු වලින් සගන්ධ තෙල් සහ අනෙකුත් අවාෂ්පශීලි සංයෝග නිස්සාරණය කිරීම සඳහා ක්ෂුද්‍ර තරංග තාක්ෂණය භාවිතා කරන නවීන ක්‍රමයක් වන අතර අඩු නිස්සාරණ කාලයන් සහ වාෂ්පශීලී සංරචක වඩා හොඳින් සංරක්ෂණය කිරීමත් නිසා ඉතා යෝග්‍ය ක්‍රමයකි.
කුරුඳු ඔලියොරෙසිනහි යෙදුම්:
කුරුඳු ඔලියොරෙසින් එහි ප්‍රබල රසය සහ සුවඳ පැතිකඩ හේතුවෙන් විවිධ කර්මාන්ත හරහා පුළුල් භාවිතයක් සොයා ගනී:
- ආහාර කර්මාන්තය: රසකාරක කාරකයක් ලෙස සහ රසකැවිලි, බීම වර්ග සහ සෝස් වැනි නිෂ්පාදනවල ආහාර වර්ණක ලෙස භාවිතා කරයි.
- සුවඳ විලවුන්: සුවඳ විලවුන් සහ රූපලාවන නිෂ්පාදනවල සුවඳ සටහන් එකතු කරයි.
- ඖෂධ: ඖෂධීය ගුණ නිසා ඖෂධීය සංයුතියට ඇතුළත් කර ඇත.
- විලවුන් සහ සබන්: සුවඳ සඳහා සහ රූපලාවන්‍ය සහ සබන් සූත්‍රවල ක්‍රියාකාරී අමුද්‍රව්‍යයක් ලෙස භාවිතා කරයි.
සෑම නිස්සාරණ ක්‍රමයක්ම විවිධ කර්මාන්ත අවශ්‍යතා සහ නියාමන ප්‍රමිතීන්ට අනුකූලව කාර්යක්ෂමතාව, නිෂ්පාදනයේ ගුණාත්මකභාවය සහ පාරිසරික බලපෑම අනුව වෙනස් වාසි ලබා දෙයි.